ഈ ചോദ്യം പതിവായി കേൾക്കാറുള്ളതുകൊണ്ട്  സമുദ്രത്തെക്കുറിച്ചുള്ള ഞങ്ങളുടെ ബോധവത്കരണസംരഭം ആസൂത്രണംചെയ്യുന്ന സമയത്ത് (നോ യുവർ ഫിഷിനു മുൻപ്) ഈ വാദമുഖത്തെക്കുറിച്ച് ഞങ്ങൾ ചിന്തിച്ചിരുന്നു. വൈയക്തികതലത്തിൽ തീർച്ചയായും സമുദ്രോത്പന്നങ്ങൾ ഉപേക്ഷിക്കുന്നതുതന്നെയാണ്  സ്വന്തം പാദമുദ്രകൾ സമുദ്രത്തിൽ ഇല്ലാതിരിക്കുവാൻ  നല്ല മാർഗ്ഗമെന്നു തോന്നും. സമുദ്രോത്പന്നങ്ങൾ ഉപയോഗിക്കുന്ന മുഴുവൻ ജനതയും അതു വേണ്ടെന്നുവെക്കണമെന്നാണ് താത്വികമായി ഇതിന്റെ അർത്ഥം. അത്തരം കടുത്ത നടപടിയെക്കുറിച്ചും അതിന്റെ പരിണതഫലങ്ങളെക്കുറിച്ചുമുള്ള  ഞങ്ങളുടെ ചിന്തകളിൽ ഉയർന്നുവന്ന ചില ചോദ്യങ്ങളാണ് താഴെ.

ഇന്ന് ഇന്ത്യയിലെ പതിവ് ആഹാരത്തിൽപ്പെട്ടതാണ് സമുദ്രോത്പന്നങ്ങൾ. ദശലക്ഷക്കണക്കിനു മനുഷ്യരുടെ ജീവനോപാധിയും അതാണ്. സമുദ്രോത്പന്നങ്ങൾ ഉപേക്ഷിക്കണമെന്ന് ഞങ്ങൾ ആഹ്വാനം ചെയ്താൽ ചില  ചോദ്യങ്ങൾ പരിഗണിക്കേണ്ടിവരും –

1. ഈ മനുഷ്യർക്കെല്ലാം കുറച്ചുകൂടി മെച്ചപ്പെട്ട ഒരു ആഹാരരീതി നാം ലഭ്യമാക്കുന്നുണ്ടോ?

2. പകരം ലഭ്യമാക്കുന്ന ആഹാരം കരയിൽനിന്ന് ലഭിക്കുന്നതാകുമോ ?

3. അങ്ങനെയാണെങ്കിൽ ഭീഷണികൾ നേരിട്ടുകൊണ്ടിരിക്കുന്ന കരയിലെ ആവാസവ്യവസ്ഥകളെ അവ എത്തരത്തിലാവും ബാധിക്കുക?

4. മത്സ്യവ്യവസായത്തെ ജീവനോപാധിയല്ലാതാക്കിയാൽ അതിനു നൽകേണ്ടിവരുന്ന മാനുഷികമായ വില (തൊഴിൽ, സ്വാസ്ഥ്യം, സാംസ്കാരികം എന്നിങ്ങനെ ) എന്തായിരിക്കും ? 

ശാസ്ത്രലേഖനങ്ങളിൽ ഇവയുടെ ഉത്തരങ്ങൾ കണ്ടെത്തുവാൻ കഴിവതും ശ്രമിച്ചിട്ടും ഈ പ്രശ്നങ്ങളെ തൃപ്തികരമായി നേരിടുന്ന ഒന്നും ഞങ്ങൾക്ക് ലഭിച്ചില്ല. ഈ വിഷയത്തിൽ ഏതെങ്കിലും ലേഖനങ്ങൾ നിങ്ങൾക്കറിയുമെങ്കിൽ അതിനെക്കുറിച്ച് അറിയുവാനും വായിക്കുവാനും ഞങ്ങൾക്ക് താത്പര്യമുണ്ട്.

കൂടാതെ, സമുദ്രോത്പന്നങ്ങൾ ഉപേക്ഷിക്കുന്നതിന് ഒരു ധാർമികതലവും ഉണ്ട്. മനുഷ്യന്റെ ഒരു പ്രവൃത്തിയും മറ്റൊരു മനുഷ്യനോ  ജീവിക്കോ  (മൃഗമോ ഷഡ്‌പദമോ ചെടിയോ സൂക്ഷമജീവിയോ) ഉപദ്രവമോ വേദനയോ പുതുക്കലോ  “അസ്വാഭാവിക”മാറ്റമോ ഉണ്ടാക്കാതിരിക്കുന്നതാണ് ഉത്തമം. എന്നാൽ ജീവശാസ്ത്രപരമായ പരിമിതികൾകൊണ്ട് മനുഷ്യർക്ക് മനുഷ്യേതരമായവയെ ആശ്രയിക്കാതെ പറ്റില്ല. അത്തരമൊരു സാഹചര്യത്തിൽ ഇപ്പോഴുള്ള മനുഷ്യന്റെ ഭക്ഷ്യസമ്പാദനവ്യവസ്ഥകളെ  അന്യോന്യം താരതമ്യം ചെയ്ത് ഏതാണ് “ഏറ്റവും ധാർമികം/ദയാപരം/മനുഷ്യത്വപരം” എന്നു കണ്ടെത്തുമ്പോൾ പ്രസ്തുത തീരുമാനമെടുക്കുക സാധ്യമല്ലെന്നു വരുന്നു.

അതിനാൽ, ഒരു ജനതയുടെ ആഹാരരീതി  ഒന്നാകെ കരയിലുള്ള ഭക്ഷ്യസ്രോതസ്സുകളിലേക്ക് മാറുക എന്നത് പ്രാവർത്തികമായ പരിഹാരമാണോ  എന്നതിന് ഉറപ്പില്ല. സമുദ്രോത്പന്നങ്ങൾ കഴിക്കുന്നതു തുടരാതെ അതിനു പകരമായി മറ്റെന്തെങ്കിലും ആഹാരമാക്കുന്നത് “കൂടുതൽ ധാർമികം” ആണോ എന്നും നമുക്കുറപ്പില്ല. ഈ കാര്യങ്ങൾ എല്ലാം കണക്കിലെടുക്കുമ്പോൾ മത്സ്യങ്ങളുടെ ജീവശാസ്ത്രം, പരിസ്ഥിതിശാസ്ത്രം, ജീവിതചക്രം ഇവയെക്കുറിച്ച് സമുദ്രോത്പന്നങ്ങളുടെ ഉപഭോക്താക്കൾക്ക് കൂടുതൽ ധാരണയുണ്ടാക്കുന്നതാണ് ജനങ്ങൾക്കിടയിൽ ചെയ്യേണ്ടതെന്ന് ഞങ്ങൾ കണ്ടെത്തി - ദിനംപ്രതിയുള്ള തെരഞ്ഞെടുപ്പുകളിൽ   അവർ സമുദ്രത്തിലെ ജീവനോട് കുറച്ചുകൂടി സഹാനുഭൂതി പ്രകടിപ്പിക്കുമെന്ന പ്രതീക്ഷയോടെ.